Unescok hizkuntzen atlas berria ezagutzera eman du aurten, 1995. eta 2001. urteetan egin zuen bezala. Bertan, 2.500 hizkuntza arriskuan daudela erakusten digute, euskara barne.  Erreakzio gutxi entzun dira gai honi buruz, eta entzun izan ditudanek, behintzat, betiko mespretxua erakutsi digute. Egia da, arrisku larrian izendatzetik, ahuldua eta zaurgarria izatera pasa duela mundu mailako erakundeak. Baina ikuspegi horrekin egoten denak ez du urrunegi begiratu, eta asmo txar eta manipulazio gogoekin ibiliko da.

EHUko irakasle batek ongi azaltzen zuen bezala, Unescok ez du euskararen egoera zehatza, zatitua, kontuan hartu. Egoera globalizatu du, Euskadiko Autonomia Erkidegokoa oinarritzat hartuz. Horren ondorioz dago zaurgarrien atalean sarturik gure hizkuntza. Alta, zehaztapenak ekarri ditu ondoren, erakunde berak, hala nola Nafarroa Garaian arriskuan dagoela eta frantses estatuaren menpe dauden herrialdeetan, berriz, arrisku larrian.

Erreakzio gutxi, beraz, argazki honen aitzinean.

Patxi Baztarrikak, Elebideren emaitza kaxkarrak azaltzean bota zuen bere iritzia: «Kezkatua naiz Iparraldean transmisioaren gabeziarekin». Hara hizkuntza sailburuorde gisa ikasi duen guztiaren fruitua! Hizkuntza transmisio naturala ez delako gehiago egiten, horregatik bakarrik galtzen dela euskara! Ze trufa! Gehiagotan etorri beharko litzateke Euskal Herri tropikalera, edo behintzat, txeke bat izenpetzera joan-jin azkar bat baino gehiago, egonaldi ederra burutu beharko luke! Lapurdik, Nafarroa Behereak eta Zuberoak duten gauza exotikoa, hizkuntza mailan, Haitik pairatzen duen miseria gorriarekin konpara daiteke Saudi Arabiako printzeen jauregien luxuarekin baino gehiago! Eta debeku guztiak jasan eta gero, euskaldunoi errua bota behar oraindik! Lotsagabea!

Okerrena, Patxi Baztarrikak jarraitzaile onak dituela... Izan ere, Eusko Jaurlaritza eta Euskara Erakunde Publikoa (EEP) eskuz esku dabiltzanez itxurakerietan eta dirua xuritzen, Frantxua (ez hain) Matiak segida hartu dio.

Harro agertu zaigu, EEPko lehendakariordea, Unescoren sailkapenak politikoek euskararen alde egiten duten lanaren isla baita! Behintzat ados gaude; baina ez dut uste interpretazio bera egiteagatik! Hau bai, euskalduna, baina anti-euskara, ez da beste ulertzerik!

Noiz sartuko dira gizadiaren aurkako krimenetan hizkuntza komunitateen aurka egindakoak? Eta horiek egin dituztenak, noiz epaitu dira?

Bitartean, Eusko Jaurlaritzaren Elebide jostailu ziztrinak 250 kexa biltzen dituelarik, Hizkuntza Eskubideen Behatokiak bere lana behar den bezala egiten segitzen du. Milaka kexa jasotzen ditu, eta nazioarteko guneetan eragiteko baliatzen ditu, besteak beste. Eta horrela segitu beharko du, politikari anti-euskaldun horien politikak eta mespretxuak salatuz. Horrela segitu beharko dugu, gure indarrekin Euskal Herri euskalduna eraikitzen ere, behar dugun hizkuntza politika eraginkorra iritsi bitartean.

Posible baita! Hor dugu Kataluniaren adibidea, behin baino gehiagotan jarri duguna. Aski da Generalitateko biltzarrak ikustea, ohartzeko espainolistenak ere katalanez mintzo direla; aski da Interneten nabigatzea, eleaniztun duten webguneetan, baita merkatuko webgune famatuenetan ere, katalanaren aukera atzemateko hizkuntzen aukeren artean! Eta hara Unescok arriskutik kendu duela hizkuntza hau, erabat! Zorionak horiei... bemol tipi batekin hala ere, hemen ere, jakobinoek lanean segitzen baitute Perpinya aldean...

Borroka gaitezen, bada, euskarak zor zaion lekua berreskura dezan, euskaldunak ezagutuak izan gaitezen eta euskaraz bizi ahal izan gaitezen!